وزیر اعلیٰ پنجاب مریم نواز شریف کے پنجاب دھی رانی پروگرام کے تحت بہاولنگر میں 47 اجتماعی شادیوں کی تقریب کا انعقاد

تقریب میں صوبائی وزیر سوشل ویلفیئر اینڈ بیت المال سہیل شوکت بٹ، ممبران قومی و صوبائی اسمبلی اور ضلعی انتظامیہ کے افسران کی شرکت۔

بہاولنگر (سیف الرحمن سے)وزیر اعلیٰ پنجاب مریم نواز شریف کے پنجاب دھی رانی پروگرام کے سلسلہ میں شاندار مارکی میں 47 اجتماعی شادیوں کی پروقار تقریب کا اہتمام کیا گیا۔ ممبر قومی اسمبلی میاں عبدالغفار کالوکا وٹو نے تقریب میں بطور خاص شرکت کی۔ تقریب میں صوبائی وزیر سوشل ویلفیئر اینڈ بیت المال سہیل شوکت بٹ، ممبر صوبائی اسمبلی سہیل خان زاہد ،ممبر صوبائی اسمبلی انعام شوکت باری ممبر صوبائی اسمبلی کاشف نوید پنسوتہ، کمشنر بہاول پور ڈویژن مسرت جبیں،مسلم لیگ (ن) کے رہنما، ڈپٹی کمشنر ذوالفقار احمد بھون ،ڈی پی او حافظ کامران اصغر، ایڈیشنل ڈپٹی کمشنر جنرل ظہور حسین ،ایڈیشنل ڈپٹی کمشنر ریونیو افتاب حسین اسسٹنٹ کمشنر نعمان احمد متعلقہ محکموں کے سربراہان میڈیا پرسن دولہا دلہن کے عزیزواقارب موجود تھے۔شرکائے تقریب نے نوبیاہتا جوڑوں کومبارکباد دی اور نیک خواہشات کا اظہار کیا۔وزیر اعلیٰ پنجاب مریم نواز شریف کی طرف سے اجتماعی شادی کے تمام جوڑوں کو ڈبل بیڈ، میٹرس، شیشہ، ڈنر سیٹ، کھانا پکانے کا سامان، پنکھا اور دیگر سامان کے تحائف سمیت دھی رانی پروگرام سلامی کارڈ بھی دیا گیا۔ دھی رانی سلامی کارڈ کے ذریعہ ہر نوبیاہتا جوڑا ایک لاکھ روپے سلامی حاصل کر سکے گا۔ محکمہ سوشل ویلفیئر اینڈ بیت المال کی جانب سے نوبیاہتا جوڑوں اور تقریب کے شرکاء کو ظہرانہ بھی دیا گیا۔صوبائی وزیر سوشل ویلفیئر اینڈ بیت المال سہیل شوکت بٹ دھی رانی نے تقریب میں اظہار خیال کرتے ہوئے نوبیاہتا جوڑوں کو وزیر اعلیٰ پنجاب کی جانب سے مبارکباد پیش کی۔انہوں نے کہا کہ وزیر اعلیٰ پنجاب صوبہ کی فلاح و بہبود اور ترقی و خوشحالی کے لئے بھرپور اقدامات کر رہی ہیں۔انہوں نے کہا کہ پنجاب دھی رانی پروگرام نہ صرف ایک فلاحی منصوبہ ہے بلکہ یہ سماجی ترقی، خواتین کی خودمختاری اور عوامی بھلائی کی طرف ایک بڑا قدم بھی ہے۔ ممبر صوبائی اسمبلی سہیل خان زاہد،نے اظہار خیال کرتے ہوئے پنجاب دھی رانی پروگرام کے شاندار انعقاد پر محکمہ سوشل ویلفیئر کے افسران و سٹاف اور منتظمین کی کاوشوں کو سراہا۔ انہوں نے نوبیاہتا جوڑوں کو زندگی کے نئے سفر کے آغاز پر مبارکباد دی۔ اس موقع پر صوبائی وزیر سوشل ویلفیئر اینڈ بیت المال سہیل شوکت بٹ نے کہا کہ دھی رانی پروگرام پنجاب کی تاریخ کا منفرد پروگرام ہے۔انہوں نے نوبیاہتا جوڑوں کو مبارکباد دی اور کامیاب اور خوشحال زندگی کے لئے دعا کی۔ انہوں نے بتایا کہ پنجاب میں رواں سال میں مجموعی طور پر 3000اجتماعی شادیاں کرائی جائیں گی اور پہلے مرحلہ میں 1500اجتماعی شادیاں کرائی جا رہی ہیں۔ تقریب سے قبل صوبائی وزیر مائنز اینڈ منرل، صوبائی وزیر سوشل ویلفیئر، اور مسلم لیگ (ن) کے رہنماؤں نے تحائف کے طور پر ملنے والے سامان کا معائنہ بھی کیا۔ تقریب میں بہاولنگر کے فنکاروں نے قوالی پیش کی۔