ڈپٹی کمشنر کا شہر کے مختلف امتحانی مراکز کا دورہ۔سیکیورٹی انتظامات سمیت دیگر سہولیات کا تفصیلی جائزہ لیا
ڈپٹی کمشنر نے امتحانی عملے سے ملاقات کی اور امتحانات کے شفاف اور منصفانہ انعقاد کے لیے کیے گئے اقدامات پر بریفنگ لی
بہاولنگر (سیف الرحمن سے) ڈپٹی کمشنر ذوالفقار احمد بھون نے شہر کے مختلف امتحانی مراکز کا دورہ کیا اور سیکیورٹی انتظامات سمیت دیگر سہولیات کا تفصیلی جائزہ لیا۔ انہوں نے امتحانی عملے سے ملاقات کی اور امتحانات کے شفاف اور منصفانہ انعقاد کے لیے کیے گئے اقدامات پر بریفنگ لی۔
ڈپٹی کمشنر نے امتحانی مراکز میں داخلے کے نظام، طلبہ کے بیٹھنے کے انتظامات، سی سی ٹی وی کیمروں کی موجودگی اور دیگر سیکیورٹی اقدامات کا معائنہ کیا۔ انہوں نے امتحانی ہالز میں نقل کی روک تھام کے لیے سختی سے عمل درآمد کی ہدایت دی اور اس سلسلے میں کسی بھی قسم کی کوتاہی برداشت نہ کرنے کا عندیہ دیا۔
اس موقع پر انہوں نے کہا کہ ضلع انتظامیہ امتحانات کی شفافیت یقینی بنانے کے لیے تمام ضروری اقدامات کر رہی ہے اور کسی بھی غیر قانونی سرگرمی کو برداشت نہیں کیا جائے گا۔ انہوں نے طلبہ کو مشورہ دیا کہ وہ محنت اور دیانت داری کے ساتھ امتحانات دیں اور کسی بھی ناجائز طریقے پر انحصار نہ کریں۔
دورے کے دوران ڈپٹی کمشنر کے ہمراہ محکمہ تعلیم اور ضلعی انتظامیہ کے افسران بھی موجود تھے۔ انہوں نے عملے کو مزید ضروری ہدایات دیتے ہوئے کہا کہ امتحانات کے دوران بجلی، پانی اور دیگر سہولیات کی بلا تعطل فراہمی یقینی بنائی جائے تاکہ طلبہ کو کسی قسم کی دشواری کا سامنا نہ ہو۔
ڈپٹی کمشنر ذوالفقار احمد بھون نے امتحانی مراکز میں تعینات عملے پر زور دیا کہ وہ اپنی ذمہ داریوں کو ایمانداری سے نبھائیں اور کسی بھی بدعنوانی یا غفلت کی صورت میں فوری کارروائی عمل میں لائی جائے گی۔
