شدید سردی و برف باری۔ محکمہ موسمیات نے وضاحت جاری کر دی

موسمی صور تحال کے بارے میں معلومات کے لیے صرف پاکستان محکمہ موسمیات کی ویب سائٹ یا سرکاری ذرائع پر اعتماد کریں۔ غیر مصدقہ اور غیر سرکاری ذرائع سے پھیلائی گئی خبروں پر یقین نہ کریں۔

اسلام آباد (ویب ڈیسک) شدید سردی و برف باری۔ محکمہ موسمیات نے وضاحت جاری کر دی۔ تفصیلات کے مطابق سوشل میڈیا پر ملک بھر میں شدید سردی اور برف باری کے حوالے سے گردش کرنے والی خبروں کے حوالے سے پاکستان کے محکمہ موسمیات نے وضاحت جاری کر دی۔ محکمہ موسمیات کی جانب جاری کیے گئے سرکاری مراسلہ میں کہا گیا ہے کہ, پاکستان محکمہ موسمیات عوام کو مطلع کرتا ہے کہ حالیہ سوشل میڈیا پر گردش کرنے والی خبر ، جس میں یہ دعوی کیا گیا ہے کہ 12 جنوری سے 15 جنوری کے دوران پاکستان کی 100 سالہ تاریخ کی سرد ترین راتیں اور دن ہوں گے ، اور وسطی پنجاب کے مختلف اضلاع میں سعودی عرب کی طرح برفباری ہو سکتی ہے ، بے بنیاد اور غیر تصدیق شدہ ہے۔
محکمہ موسمیات واضح کرتا ہے کہ پنجاب کے وسطی اضلاع میں برفباری کا امکان نہیں ہے کیونکہ یہ علاقے جغرافیائی اور موسمیاتی طور پر ایسی صور تحال کے لیے موزوں نہیں ہیں۔
محکمہ موسمیات کے مطابق، ملک کے بیشتر علاقوں میں موسم سرد اور خشک رہنے کی توقع ہے، لیکن ایسی غیر معمولی شدت یا تاریخی سردی کی کوئی تصدیق نہیں کی گئی ہے۔ تاہم 11 جنوری بروز ہفتہ لاہور ، شیخوپورہ، قصور ، اوکاڑہ، ساہیوال، سیالکوٹ ، نارووال، گوجرانوالہ، بہاولنگر، بہاولپور، پاکپتن اور گرد و نواح میں چند مقامات پر گرج چمک کے ساتھ ہلکی بارش / بوندا باندی کا امکان ہے
محکمہ موسمیات اپنی پیش گوئی اور رپورٹس عوام کو صرف مصدقہ اور مستند ڈیٹا کی بنیاد پر فراہم کرتا ہے۔ اس قسم کی افواہیں عوام میں خوف و ہر اس پھیلانے کا باعث بنتی ہیں اور ان سے گریز کیا جانا چاہیے۔
عوام سے گزارش ہے کہ وہ موسمی صور تحال کے بارے میں معلومات کے لیے صرف پاکستان محکمہ موسمیات کی ویب سائٹ یا سرکاری ذرائع پر اعتماد کریں۔ غیر مصدقہ اور غیر سرکاری ذرائع سے پھیلائی گئی خبروں پر یقین نہ کریں۔
ہماری ذمہ داری ہے کہ ہم اپنے وسائل اور رہنمائی سے عوام کی حفاظت یقینی بنائیں۔ اس دوران افواہوں کو نظر انداز کریں اور صرف مستند ذرائع سے رجوع کریں۔